Vrasja e rojës Renato Hoxhaj në Vlorë më 27 prill të këtij viti duket se ka pasur një parapërgatitje dhe një investim të madh nga grupi kriminal.
Top Channel mëson se rumuni qëndroi në Shqipëri plot një javë duke vëzhguar me imtësi jo vetëm objektivin e tij, por edhe gjithë rrugët ku do të ndiqte para dhe pas krimit.
Guidë për të shërbeu 42-vjeçari Kleanth Bylyku, alias Armando Gega, i cili ra në prangat e policisë së Vlorës dy ditë më parë. Ai doli zbuluar teksa shihej në shoqërinë e vrasësit çdo ditë të qëndrimit të tij në Shqipëri, që nga marrja e makinës në Tiranë deri në ditën kur u krye vrasja.
Pavarësisht se ai ka qëndruar i heshtur para hetuesve, provat kundër tij janë të qarta. Gjykata e Vlorës ka caktuar ndaj tij masën e sigurisë “arrest me burg”, i dyshuar për veprën penale “vrasje me paramendim, kryer në bashkëpunim”. Edhe më herët ai ka qenë në pranga për armëmbajtje.
Për vrasjen e Hoxhajt, më datë 30 prill u arrestua edhe Eris Mehmetaj, i akuzuar si bashkëpunëtor. Mehmetaj dyshohet se ka siguruar automjetin me të cilin autori ka lëvizur në Vlorë ditën e ngjarjes.
Po kështu ai ka ndërruar targat për të shmangur identifikimin nga policia. Ai ishte mik i Roan Brahimit, i ekzekutuar në Greqi.
Grupi hetimor dyshon se ekzekutimi i 58-vjeçarit u porosit nga Dubai, ku strehohet një grup kriminal nga Vlora, pasi kishin dyshime se viktima kishte qenë informator për grupin kundërshtar.
Kontraktimi i një vrasësi rumun për të eliminuar Renato Hoxhajn nga një grup kriminal në Vlorë nuk është një rast i izoluar. Edhe më herët grupe kriminale kanë kontraktuar vrasës të huaj për të larë hesapet.
Kujtojmë se në janar të 2018 në Tiranë u vra Devi Kasmi nga një ish-komando grek, Eftimio Eftimiu. Ndërsa në prill 2023 një skuadër britanikësh u angazhua për të vrarë Ardian Nikulajn në Shëngjin.
