Gjykata Themelore në Ferizaj ka caktuar masën e paraburgimit prej një muaji ndaj dy të dyshuarve për vrasjen e një personi në Bibaj të Ferizajt më 16 gusht.
Sipas vendimit, Festim Ramadani dhe J.M, duke bashkëpunuar me njëri-tjetrin, vranë mbrëmjen e 16 gushtit Sabri Sabriun në dasmën e nipit të tij.
Festim Ramadani, zyrtar policor, ishte dorëzuar vet tek autoritetet, ndërkaq J.M ishte arrestuar pas krimit. Viktima Sabri Sabriu u vra në parkingun e një salle dasmash në Ferizaj mbrëmjen e 16 gushtit.
Prokuroria Themelore në Ferizaj tha një ditë më herët se Ramadani dyshohet se e ka kryer vrasjen me armën zyrtare.
Si Prokuroria, ashtu edhe Gjykata Themelore thanë se ish-zyrtari i policisë e ka kryer vrasjen “për qëllime të ulëta”. Sipas institucioneve të drejtësisë, ai sapo ka vërejtur viktimën që ka hyrë në parkingun e sallës së dasmave, me të dyshuarin tjetër, J.R., secili me vetura të tyre janë nisur drejt viktimës. J.M. dyshohet se me një mjet të fortë i është vërsulur viktimës, ndërkaq Festim Ramadani me armë zyrtare ka shtënë disa herë drejt Sabri Sabriut, i cili ka vdekur në vendin e ngjarjes.
