Gjykata e Ankonës ka dënuar me nga 28 vite burg dy shqiptarë të akuzuar për vrasjen e një bashkatdhetari të tyre, në vitin 2015. Krimi kishte ndodhur, pas zbulimit se i riu kishte lidhje intime me të fejuarën e një prej autorëve.
Gjykata e Ankonës dënoi me nga 28 vite e katër muaj burg Igli Metën e Mario Memën, të akuzuar për vrasjen e adoleshentit 17-vjeçar, Ismail Luli.
I pranishëm në seancë, Igli Meta tha se kërkonte falje për të gjithë. Ai tha se ishte gabim dhe se donte të paguante për atë që kishte bërë, por se nuk e kishte vrarë ai Ismailin.
Ismail Luli, u vra me 19 Korrik të vitit 2015, në zonën e Sant Anxhelos, pranë Ankonës në Itali.
Vrasja ndodhi si hakmarrje ndaj Ismailit, pasi ai dyshohej se kishte lidhje intime me një vajzë me emrin Ambra, e cila ishte e fejuara e Igli Metës. Ky i fundit u njoftua nga një mik për tradhtinë dhe vendosi të hakmerrej.
