Kreu i Parlamentit, Gramoz Ruçi gjatë një konference të përbashkët me homologun e tij maqedonas, foli edhe për tensionet që përshkallëzuan dy ditë më parë në zgjedhjen e kryeprokurores së re të përkohshme.
I pyetur nga gazetarët, Ruçi tha se në karrierën e tij 27-vjeçare si deputet nuk kishte hasur 3 gjëra, duke sulmuar kështu opozitën.
“Kam 27 vite deputet në këtë parlament, kam qenë në rolin e opozitës dhe mazhorancës, shumë gjëra janë bërë, por tre gjëra nuk kanë ndodhur
E para, asnjë opozitë nuk ka nxitur protestuesit të hyjnë në Kuvend
E dyta, nuk ka ndodhur që parlamentarët në seancë të përdorin violencë dhe mjete të forta deri në tymuese e këpucë për anëtarët e kabinetit
E treta, nuk ka ndodhur ushtrim dhune ndaj parlamentarëve, duke rrëmbyer kartat 3 deputetëve për t’i mohuar të drejtën për të votuar. Tre deputetë nuk mundën të votonin, dhe dy deputetë përdorën kartat e kolegëve të tyre,” tha ai.
