Deputetja e LSI Kejdi Mehmetaj e ka sulmuar ashpër kolegun deputet Robert Bitri, i cili u bë protagonist i votimit të debatueshëm në Kuvend të ligjit për shembjen e Teatrit Kombëtar.
Ja ç’shkruan Mehmetaj sot në rrjetet sociale, në mesazhin e titulluar “Rilindasi i vonuar, alias Robert Bitri ..”
“Nuk kishte se si të mos bëhej sërish protagonist i shëmtisë së maxhorancës në përpjekjen për të prishur Teatrin, edhe rilindasi më i ri i rilindjes së vjetër të Edi Ramës, përkatësisht Robert Bitri!
Sepse, megjithëse i ka sytë në ballë, e megjithëse nuk ka shfaqur simptoma çorientimi, nuk na ka dhënë ndonjë shenjë se nuk di as shkrim e as këndim, aq sa për të mos lexuar emrin e tij në kartën e vet apo edhe në monitorin e sallës së Kuvendit!
Mungesë integriteti, karakter të dyfishtë, moral të denjë për një rilindas shëtitës!
Ky është portreti i Robert Bitrit, rilindasit më të ri të rilindjes së vjetër të Edi Ramës, i cili nuk ka se përse të qëndrojë më as formalisht në rradhë me deputetët e LSI-së!“
