Bizneset që nuk do të deklarojnë në kohë ndryshimet në strukturën e ortakërisë, brenda 30 ditëve, do të ndëshkohen me masa administrative, që arrin deri në 100 mijë lekë. Një ndryshim në ligjin “Për regjistrimin e biznesit” synon të rregullojë pikërisht këtë hallkë. “Aplikimi për ndryshimin e ortakut dhe strukturës së ortakërisë të personit juridik bëhet brenda 30 ditëve nga data e ndryshimit faktik të ortakut dhe strukturës së ortakërisë, me përjashtim të rasteve të parashikuara nga ligji”, thuhet në draft-ligjin e nxjerrë tashmë për konsultim.
Në rastet kur nuk respektohet ky afat, ndryshimet ligjore parashikojnë edhe masa administrative si gjoba. Konkretisht, moskryerja e detyrimit për regjistrimin e ndryshimit të ortakut dhe/ose strukturës së ortakërisë të personit juridik, brenda 30 ditëve nga data e ndryshimit faktik të ortakut dhe/ose strukturës së ortakërisë, me përjashtim të rasteve të parashikuara nga ligji, përbën kundërvajtje administrative dhe dënohet me gjobë 100 000 lekë.
Për shoqëritë aksionare, mosplotësimi i detyrimit të përcaktuar në pikën 4, të nenit 43, të këtij ligji, përbën kundërvajtje administrative dhe dënohet me gjobë 100 000 lekë. Një tjetër ndryshim lidhet me personat që mund të bëjnë aplikimin fillestar për regjistrimin. Kështu, në nenin 26 pika 3 bëhet një ndryshim, ku nënvizohet se “aplikimi për regjistrimin fillestar të shoqërive tregtare bëhet bashkërisht nga të gjithë themeluesit ose nga administrator i shoqërisë, ose nga çdo person i autorizuar prej tyre.
Aplikimi për regjistrimet e tjera bëhet nga personat përgjegjës për përfaqësimin e shoqërisë në marrëdhënie me të tretët ose çdo person i autorizuar prej tyre. Aplikimi për regjistrimin e veprimeve juridike, që lidhen pjesëmarrjet, kuotat apo aksionet, mund të kryhen gjithashtu edhe nga anëtari, ortaku apo aksioneri, të cilit këto i përkasin”.
Konsultimi i projektligjit
Ndryshimet në ligjin “Për regjistrimin e biznesit” janë nxjerrë për konsultim në një paketë bashkë me ligjin “Për procedurat tatimore” si dhe atë “Për parandalimin e pastrimit të parave dhe financimin e terrorizmit”. Një tjetër ndryshim lidhet me personat që mund të bëjnë aplikimin fillestar për regjistrimin. “Aplikimi për regjistrimin fillestar të shoqërive tregtare bëhet bashkërisht nga të gjithë themeluesit ose nga administrator i shoqërisë, ose nga çdo person i autorizuar prej tyre. Aplikimi për regjistrimet e tjera bëhet nga personat përgjegjës për përfaqësimin e shoqërisë në marrëdhënie me të tretët ose çdo person i autorizuar prej tyre. Aplikimi për regjistrimin e veprimeve juridike, që lidhen pjesëmarrjet, kuotat apo aksionet, mund të kryhen, gjithashtu dhe nga anëtari, ortaku apo aksioneri, të cilit këto i përkasin”, citon relacioni i projektligjit.
Transaksionet me biznese me status pasiv gjobiten
Bizneset e rregullta që kryejnë transaksione me subjekte në status pasiv do të gjobiten. Ligji për procedurat ka hyrë në fuqi dhe tatimet kërkojnë që të bëhet kujdes në këtë drejtim. Ndërkaq, në ligj janë bërë një sërë ndryshimesh të tjera, të cilat vendosin kufizime për hapjen e nipteve për personat fizikë si dhe detyrojnë subjektet të paguajnë detyrimet përpara se të kalojnë në statusin pasiv. Aktualisht pritet që ligji të kompletohet me aktet nënligjore për zbatimin më efikas dhe synohet që me këto ndryshime të minimizohet evazioni fiskal dhe të zgjerohet baza e tatimpaguesve.
