Policia e Vlorës ka zbardhur një ngjarje të datës 1 shtator, kur në qytetin e Fierit, iu vodh çanta një 40-vjeçareje. Brenda çantës janë vjedhur 695 mijë lekë të rinj, 2 pasaporta, 1 kartë ID, një kartë banke dhe disa sende të tjera.
Mësohet se autorët e dyshuar të grabitjes janë dy adoleshentë, tashmë të identifikuar nga policia, si K.B, 13 vjeç dhe R.L, 14 vjeç, të dy banues në Vlorë.
Njoftimi i plotë:
Finalizohet operacioni i koduar “SHËTITËSIT”.
Operacion në kuadër të punës për zbardhjen e vjedhjeve të ndodhura më parë.
Gjatë kontrolleve dhe shoqërimeve të personave të dyshuar për vjedhje, si dhe mbi bazën e informacioneve të marra në rrugë operative është bërë e mundur zbardhja e ngjarjes së ndodhur në datë 01.09.2018 në qytetin e Fierit ku në lagjen “1 Maj” Fier, dy shtetas i kanë vjedhur çantën shtetases V.Ll, 40 vjeçe.
Nga kontrolli i banesave të këtyre shtetasve, policia ka sekuestruar në cilësinë e provës materiale shumën e lekëve të vjedhura dhe sendet e tjera që ndodheshin në çantë:
– 659.000 lekë të reja,
– 2 pasaporta, 1 kartë ID, 1 kartë banke dhe sende të tjera në emër të shtetases V.Ll.
Veprimet proceduriale të mëtejshme në lidhje me personat e dyshuar të kësaj ngjarje, shtetasit K.B, 13 vjeç dhe R.L, 14 vjeç, të dy banues në Vlorë, do kryhen nga Drejtoria Vendore e Policisë Fier.
