Dëmet e paguara nga kompanitë e sigurimeve janë në rënie të ndjeshme këtë vit. Sipas të dhënave nga Autoriteti i Mbikëqyrjes Financiare, në shtatë muaj siguruesit kanë paguar 2.67 miliardë lekë dëme, në rënie me 13.3% krahasuar me të njëjtën periudhë të një viti më parë. Dëmet e paguara kanë rënë si në segmentin e jetës, me 26%, ashtu edhe në sigurimin e jo-jetës, me 13.5% më pak.
Tregu shqiptar i sigurimeve vazhdon të ketë raportin më të ulët dëme-prime në Europë. Ky raport ka zbritur në 28.3%, nga 34.8% që kishte qenë një vit më parë. Kompanitë kanë paguar më pak dëme në veçanti për kartonin jeshil, sigurimin e shëndetit dhe të aksidenteve në udhëtim, ndërsa më shumë dëme janë paguar më sigurimet e brendshme motorrike. Sigurimi për përgjegjësitë motorrike ndaj palëve të treta vazhdon të dominojë në strukturën e dëmeve të paguara, me 46% të totalit.
Për sa i takon primeve, tregu ka shfaqur një përmirësim të lehtë gjatë korrikut, megjithatë rritja ngelet modeste, me 6.3% më shumë krahasuar me një vit më parë. Sigurimet e detyrueshme motorrike dominojnë gjithnjë e më shumë tregun, me mbi 65% të primeve të arkëtuara. Po të llogarisim edhe sigurimet e tjera që janë faktikisht të detyrueshme, si sigurimi i jetës së debitorit dhe pronës për kreditë bankare, apo sigurimi nga aksidentet në udhëtim, në masën dërrmuese sigurimet ngelen një treg që mbështeten në produkte të detyrueshme, ndërsa sigurimi i mirëfilltë vullnetar është në vlera të papërfillshme.
