Kryeministri Edi Rama ka reaguar lidhur me vlerësimet negative (review) të publikuara në profilet e disa bizneseve shqiptare në Google, duke i cilësuar ato si pjesë e një “sulmi të organizuar” ndaj sipërmarrjeve turistike.
Përmes një postimi në rrjetet sociale, Rama deklaroi se çështja ka arritur deri te autoritetet më të larta të Google, të cilat, sipas tij, janë angazhuar për të ndihmuar në rikthimin e vlerësimeve të bizneseve të prekura.
Sipas kryeministrit, persona të lidhur me ‘protestën e flamingove’ kanë hapur rreth 10 mijë llogari të reja në Google, me qëllim publikimin masiv të vlerësimeve negative ndaj hoteleve, bujtinave dhe restoranteve, duke dëmtuar reputacionin e tyre. Ai e cilësoi këtë veprim si një “sulm kriminal” ndaj sipërmarrjes.
Rama përdori tone të ashpra ndaj organizatorëve të protestës, duke i akuzuar se janë kundër investimeve dhe zhvillimit ekonomik të vendit.
Ndërkohë, sipas kryeministrit, Policia e Shtetit po heton rastin, ndërsa në bashkëpunim me Google po punohet për rikthimin e vlerësimeve që, sipas tij, janë hequr në mënyrë të padrejtë nga profilet e bizneseve.
Deri më tani, autoritetet nuk kanë bërë publike detaje të tjera mbi hetimin dhe nuk ka një konfirmim të pavarur lidhur me numrin e llogarive të përdorura apo përgjegjësit e dyshuar për këtë aktivitet.
Reagimi i Ramës:
Jehona e një TURPI ALLA SHQIPTARÇE arriti deri në majën e piramidës së Google, ku autoritetet tona kërkuan ndihmë për të nxjerrë një sërë sipërmarrjesh nga BLOZA E TERRORIT DIGJITAL të ushtruar prej pengmarrësve të protestës së flamingove, të cilët përmes 10 mijë llogarive të hapura enkas organizuan dhe orkestruan një SULM TË PADËGJUAR KRIMINAL mbi hotele, bujtina, restorante, duke u hequr me DHUNË yjet e mbledhura nga përshtypjet pozitive të klientëve
Pra, logjika e hurit dhe drurit që i ka dhënë protestës ngjyrën e sorrave e zërin e korbave: Nuk duam investorë të huaj, nuk duam biznese vendase, duam litar, burg, zjarr – tip naziskinësh me qeleshe e komunistash me flamur në qafë, laro e balo të duartrokitur me pasion nga dështakëzemërakë të rënë nga vakti, plot urrejtje, ligësi e mediokritet të pangushëllueshëm
Policia vijon me hetimin e skemës kriminale, ndërkohë që me ndihmën e Google-it faqet e sipërmarrjeve po u rikthehen yjet e merituara me punë e mund të madh
