Ndihmës Sekretari Amerikan për Çështjet Evropiane dhe Euroaziatike, Philip Reeker ka mbërritur në kryeministri ku po zhvillon një takim me Edi Ramën.
Numri dy i DASH shoqërohej nga Yuri Kim, ndërsa në fokus të takimit do të jenë marrëdhëniet SHBA-Shqipëri dhe fushat e shqetësimit të ndërsjellë.
Siç duket edhe nga pamjet, ai është i rrethuar nga truprojat e tij, që i ruajnë sigurinë nga të gjitha anët.
Më pas, është planifikuar që zyrtari i lartë i DASH të zhvillojë një takim edhe me kryedemokratin Lulzim Basha.
Pas Tiranës ambasadori Reeker, më 1 korrik do të mbërrijë në Ohër, ku do të marrë pjesë në Konferencën “Rruga për në Prespë” për të theksuar mbështetjen e SHBA për dialogun e vazhdueshëm dhe bashkëpunimin drejt stabilitetit dhe progresit në të gjithë rajonin.
Marrëveshja 5 G
Pak ditë më parë, Sekretari Amerikan i Shtetit Antony Blinken, së bashku me kryeministri Edi Rama firmosën marrëveshjen për koordinimin e teknologjisë 5G mes SHBA dhe Shqipërisë.
Marrëveshja mes dy liderave të lartë u nënshkrua në Bruksel, ku Rama dhe Blinkin zhvilluan një takim së bashku.
Blinken tha se kështu po vendoset një shembull i fortë lidhur me punën së bashku në raport me teknologjinë e sigurt.
“Faleminderit shumë që jeni këtu. Faleminderit për punën që kemi bërë së bashku. Po vendosni një shembull të fortë për të tjerët sot për nevojën për të siguruar se kur bëhet fjalë për rrjetet më të ndjeshme të teknologjisë që kemi ne të punojmë me shitës të besuar.
Kjo është e rëndësishme dhe një mesazh për ti dërguar të tjerëve. Ajo që është më e rëndësishme jemi mirënjohës për punën që SHBA dhe Shqipëria kanë bërë së bashku në shumë fusha të ndryshme përfshi edhe stërvitjen Defender21.Presim që të merrni vendin tuaj në Këshillin e Sigurimit. Kemi shumë punë për të bërë edhe atje dhe ky partneritet po behët më i fortë dhe më i thellë dhe ne e vlerësojmë shumë lidershipin tuaj” – tha Blinken.
