Zv.kryeministri Arben Ahmetaj në një konferencë për media me ministren gjermane për Evropën Ana Luhrman deklaroi se shpreson që në 6 muajit e ardhshëm të hapen formalisht negociatat për Shqipërinë.
Ahmetaj u shpreh se i shprehu ministres shqetësimin e kryeministrit për vonesën në proces, duke theksuar se tanimë nuk ka asnjë vend anëtar të BE-së që ta pengojë integrimin.
“Vizita e ministres në Maqedoninë e Veriut dhe Shqipëri, është vizita e tretë në Shkup dhe Tiranë janë një sinjal tejet domethënës, i fortë. Ndava me ministren të gjithë atë ndjesi dhe shqetësim që kryeministri Rama dhe qeveria shqiptare ka për vonesën e hapjes formale të negociatave me BE-në, duke theksuar se qytetarët shqiptarë, Shqipëria vazhdon të referojë një mbështetje rreth 90 për qind në të gjitha sondazhet për procesin e integrimit evropian. I shpreha keqardhjen ministres se tashmë ne i kemi bërë të gjitha detyrat e shtëpisë. Sot që flasim nuk ka asnjë vend anëtar të BE-së që të ngrejë një problematikë që ta pengojë hapjen formale të negociatave. Megjithëse Komisioni ka tre vite rresht që konfirmon se Shqipëria ka bërë detyerat e shtëpisë. Megjithëse edhe në KiE është pohuar e njëjta gjë. Në gjashtë muajit e ardhshëm shpresojmë që të kemi hapjen formale të negociatave. Ashtu sic KiE e ka theksuar hapja e negociatave bazohet mbi meritat. Jemi gati që të kapim kohën e humbur. Grupi negociator punon përditë, kryeministri dhe qeveria e monitron punën e grupit negociator përditë”, tha Ahmetaj.