Paraditen e sotme në lagjen Nr.17 është përfshirë nga flakët një apartament në qytetin bregdetar, ndërsa janë lënduar dhe ndodhen në gjendje të rëndë një çift të moshuarish që ndodheshin në banesë dhe zjarrfikësi, që i shpëtoi.
Të lënduar janë çifti i të moshuarve me inicialet G.T. dhe M. D. rreth 70 vjeç, të cilët ndodhen në gjendje të rëndë në Spitalin Rajonal Durrës. Gjithashtu është asfiksuar punonjësi i zjarrfikëses me inicialet A. K. i cili ndodhet në spital nën kujdesin e mjekëve, jashtë rrezikut për jetën.
Zjarrfikësi i asfiksuar u fut tre herë në banesë për të nxjerrë dy të moshuarit, ndërsa në fund mbeti i asfiksuar. Ndërhyrja punonjësve të tjerë të zjarrfikëses, por edhe banorëve të zonës shpëtoi dy të moshuarit dhe punonjësin, të cilit iu dha me shpejtësi ndihma e parë.
Drejtori i zjarrfikësve Adriatik Velaj deklaroi për Report Tv se punonjësi është jashtë rrezikut për jetën pas marrjes së ndihmës së parë. “Zjarri ka rënë në një banesë në pallatet sociale. Njëri prej punonjësve të zjarrfikësve është dëmtuar dhe është dërguar në spital, pasi u fut tre herë në banesë për të nxjerrë të moshuarit. Aktualisht ndodhet jashtë rrezikut për jetën”.
Policia ka nisur hetimet, ndërsa nga të dhënat e para raportohet se zjarri ka rënë për shkak se burri i moshuar kishte harruar cigaren ndezur në banesë. Zjarri përfshiu dhomat duke i bllokuar brenda, ndërsa fqinjët lajmëruan policinë dhe zjarrfikësen që i shpëtoi.
