Mediat amerikane kanë publikuar pamje nga momenti kur shembet ura e kalimtarëve në Florida. Të paktën 6 persona mbetën të vdekur dhe 10 të tjerë janë plagosur. Ura, e cila peshonte 950 ton, u rrëzua duke zënë poshtë tetë makina.
Në vendngjarje shkuan me urgjencë ekipet e kërkim/shpëtimit, ndihma e shpejtë dhe policia. Guvernatori i Floridas, Rik Scott u tha gazetarëve se do të nisë një hetim i plotë për të zbuluar shkaqet e kësaj tragjedie.
Ura me vlerë 14 milionë Dollarë ishte ndërtuar për të lidhur Kampusin Universitar të Floridas me qytetin Sweetwater. Autoritetet kishin parashikuar që kjo urë do të zgjaste të paktën 100 vite dhe mund t’i bënte ballë edhe stuhive të forta të kategorisë 5.
