Ishte data 17 shtator e vitit të shkuar, kur Neymar dhe Cavani përplaseshin për një 11-metërsh në fushën e lojës gjatë takimit PSG – Lyon. Neymar kërkoi të vendosë topin te pika e bardhë për të ekzekutuar, por Cavani nuk e la të vazhdonte më tej duke e ekzekutuar ai këtë mundësi. Gjuajti, por portieri i Lyon e priti topin. Nga ana tjetër, Neymar u zemërua për këtë rast.
As më shumë e as më pak sesa dita e sotme, ky rast zbriti në Shqipëri, pikërisht në stadiumin “Adush Muçaj” të Ballshit në ndeshjen Bylis – Tirana që përfundoi me rezultatin 1-1.
Murataj fitoi penalltinë, bëri gati topin te pika e bardhë, por urdhri nga trajneri ishte që ekzekutimin ta bënte Shoshi, kapiteni i skuadrës. Ndërkohë që Shoshi afrohej te topi, Murataj i kërkon që ta gjuajë vetë penalltinë. Por, nuk ndodhi kështu dhe Murataj u zemërua, duke vendosur duart në kokë në shenjë zemërimi. Në fund, gjuan Shoshi dhe sfera përfundon në rrjetë, ndryshe nga Cavani.
