Nënkryetarja e Parlamentit, Vasilika Hysi shprehet se Kuvendi i ka pothuajse gati kandidatët e tij për Këshillin e Lartë të Prokurorisë. Sipas Hysit, Operacioni Ndërkombëtar i Monitorimit ka përfunduar vlerësimin për kandidatët për KLP nga Avokatura dhe nga pedagogët dhe tani pritet edhe vlerësimi për kandidatin nga shoqëria civile. Pasi të kalohet edhe kjo fazë atëherë komisioni i ligjeve krijon një komision ad hok me 5 anëtarë nga opozita dhe mazhoranca të cilët do të bëjnë vlerësimet të listës finale.
“Procedura qe zhvillon Komisioni i Ligjeve është e përcaktuar qartë në ligj dhe është e përcaktuar në mënyre te detajuar, pra qe do të thotë vazhdimi i procesit duke ngritur një komision Ad Hok me 5 anëtarë, tre nga mazhoranca dhe dy nga opozita ne komisionin e ligjeve. Çdo kandidat për KLP nga Shoqëria Civile duhet të marrë të paktën 4 vota nga komisioni. Anëtarët që do të vijnë nga shoqëria civile në KLP do të jenë 5, dy nga avokatia, dy nga pedagogët dhe një nga shoqëria civile”
Këshilli i Lartë i Prokurorisë do të përbëhet nga 11 anëtarë, 6 nga radhët e prokurorëve që do t’i nënshtrohen vetingut dhe 5 nga shoqëria civile. Ndërsa kandidatët nga shoqëria civile janë gati, ende nuk ka asnjë rezultat nga Komisioni Posaçëm i Kualifikimit për prokurorët. Hysi thotë se në këtë fazë procesi është në dorën e prokurorëve
“Kandidatët për anëtar të Këshillit të Lartë të Prokurorisë nga radhët e prokurorëve tashmë i kanë kaluar Komisionit të Posaçëm të Kualifikimit dhe pa kaluar ata në këtë filtër nuk mund të ngrihet KLP. Duhet të kompletohet me 11 anëtarë në mënyrë që KLP të quhet e ngritur”
Pas përfundimit të procesit të ngritjes së Këshillit të Lartë të prokurorisë dhe atij gjyqësor, brenda 2 muajsh duhet që të ngrihet edhe Byroja Kombëtare e Hetimit dhe Gjykata Speciale. (TemA TV)
