Gjyqtarja Alma Brati drejt konfirmimit në detyrë. Do të jeopet sot vendimi për vettingun ndaj Alma Bratit, gjyqtare në Gjykatën e Tiranës dhe kandidate për në Këshillin e Lartë të Gjyqësorit me trupë gjyqësore Pamela Qirkon, Lulzim Hamitaj dhe Genta Tafa Bungo.
Sipas raportit të ILDKPKI-së, deklarimi i pasurive të gjyqtares ishte i saktë, nuk kishte fshehje dhe nuk ka konflikt interesi.
KPK tha se kemi konstatuar kontradikta në deklarime por pasaktësitë nuk çuan në indicie për fshehje të pasurisë.
Ndërsa raporti i DISK për kontrollin e figurës thotë se subjekti nuk ka kontakte me persona të lidhur me krimin e organizuar. Sipas KPK Alma Brati duhet të konfirmohet në detyrë.
Gjyqtarja Alma Brati zotëronte 25 për qind të një shtëpie dykatëshe, të blerë për 1.9 milionë lekë në Durrës. Në fund të vitit 2017, pasuria e gjyqtares kap vlerën e 16.5 milionë lekëve, duke shënuar rritje prej mbi 8 herë krahasuar me vitin fillestar.
Pasuria e zonjës Brati është shtuar me një apartament banimi me sipërfaqe 101 metra katrorë në Tiranë me vlerë 80 mijë euro, një automjet i tipit “Mazda” me vlerë rreth 2.5 milionë lekë si dhe kursime në cash në vlerën e 1.1 milionë lekëve. Duke iu referuar deklaratave të saj periodike, apartamenti është blerë me një kredi bankare prej 7 milionë lekësh dhe 25 mijë euro hua nga tezja e saj. Përmes një kontrate leasing është blerë gjithashtu edhe automjeti.
Sa i përket aftësisë së figurës u depozituan 5 ankesa, të cilat janë kompetencë e gjykatave më të larta dhe jo e KPK-së, siç u vlerësua.
Alma Brati kërkon rikonfirmimin në detyrë, duke theksuar se i qëndron gjithçkaje ka deklaruar dhe ka paraqitur për KPK-në.