Sot është inauguruar godina e Vetingut, në një ceremoni ku morën pjesë komisionerët e vetingut dhe ambasadorët Donald Lu e Romana Vlahutin.
Pikërisht në këtë ditë, Gjykata Kushtetuese ka marrë vendimin për një padi për vetingun. Raportohet se Kushtetuesja ka rrëzuar padinë e Unionit të Gjyqtarëve. Gjykatësit kishin ankimuar 25 nene të vetingut.
Prej ditësh pritej që të kishte një vendim për këtë çështje. Ndërsa Kryeministri Edi Rama në një postim në Facebook ka përgëzuar nisjen e vetingut, duke thënë se sistemi duhet të pastrohet nga gjyqtarët dhe prokurorët e korruptuar.
“Urime, kurajo, suksese komisionerëve të Vetingut! Njerëzit e këtij vendi meritojnë një sistem drejtësie pa gjykatës e prokurorë të korruptuar”, shkruan Rama në rrjetet sociale.
Ndërsa ambasadori amerikan Donald Lu dhe ambasadorja e BE Romana Vlahutin e konsideroi ditë shprese për Shqipërinë nisjen e punës për vetingun.
