Të paktën 16 persona mbetën të vdekur dhe shumë të tjerë u plagosën pasi një vetëtimë goditi kishën adventiste Dita e Shtatë, në Ruanda. Lajmin e bënë të ditur autoritetet lokale.
Katërmbëdhjetë persona humbën jetën në vendin e ngjarjes, në kishën e distriktit Nyaruguru, në Provincën e Jugut, ndërsa dy të tjerë ndërruan jetë pak më vonë në spital, konfirmoi për AFP-në kryebashkiaku Habitegeko Francois.
Rreth 140 persona po ndiqnin meshën e së dielës, kur një vetëtimë goditi kishën.
Shumë prej besimtarëve morën mjekime në disa spitale të zonës.
Sipas mediave lokale, vetëm 3 prej të plagosurve janë në gjendje kritike.
Kryebashkiaku Francois është shprehur se një aksident i kësaj natyre ka ndodhur edhe të premten e shkuar, kur një vetëtimë goditit një grup studentësh, duke lënë të vdekur njërin prej tyre.
AFP – Përgatiti: Gazmira Sokoli
