Regjisori Robert Budina ka komentuar takimin që ata kanë pasur me ambasadoren e BE-së Romana Vlahutin.
Budina tha se ata ja kanë bërë të qartë ambasadores se kalimi i këtij ligji po e shndërron Shqipërinë në një diktaturë të vërtetë, ndërsa tha se i kanë dorëzuar përfaqësueses së BE-së informacion të mjaftueshëm se ku mbështeten ligjërisht pretendimet e tyre.
’’Shumë media të huaja kanë reaguar për çështjen e Teatrit Kombëtar, ne lamë sot një rrugë të hapur komunikimi me ambasadoren e BE-së Romana Vlahutin. Ne i dorëzuam ambasadores Vlahutin informacione shtesë në mënyrë që ajo ti paraqesë pranë BE-së.
Ne i konfirmuam ambasadores faktin se qëndresa jonë do të jetë e paepur, ashtu siç kemi bërë çdo ditë në këto muajt e fundit.
Ka pasur një mungesë të theksuar transparence për ligjin në tërësi, duke na lënë ne jashtë këtij procesi. Ne jemi të bindur se kësaj lufte do ti shkojmë deri në fund, duke nxitur politikën që të bëjë mirë detyrat e saj.
Ne i kemi bërë një kërkesë të dytë presidentit Ilir Meta, pasi ende nuk kemi marrë përgjigje për një takim me të, duke i kërkuar atij të mos e dekretojë ligjin. Sa kohë që është jashtë funksionit Gjykata Kushtetuese duhet të jetë presidenti ai që duhet ta bllokojë këtë ligj.
Qëndresa jonë do vendosë sesi palët do të qëndrojnë problemin, unë besoj se qeveria shqiptare duhet që të reflektojë. Ne presim që të ketë një reagim dhe nga vetë UNESCO për çështjen e Teatrit Kombëtar”, tha Budina.