Rreth 120 familje do të rehabilitohen në banesa të reja vetëm duke nënshkruar një kontratë huapërdorimi me Bashkinë e Tiranës.
Bëhet fjalë për familjet e prekura nga projekti për rehabilitimin e Lumit të Tiranës si dhe pjesëtarë të komunitetit rom, që jetojnë në kushte të vështira në Shkozë.
Të parët do të strehohen pa pagesë në banesat e ndërtuara në ish-territorin e repartit ushtarak nr.8837 në Shkozë, ndërsa pjesa tjetër përfitojnë një nga banesat e ndërtuara posaçërisht për ta, falë projektit “New House-new life”.
Bashkia ka gati banesat, e bashkë me të dhe projektvendimin, në të cilën listohen familjet përfituese. Ajo pritet të miratohet të mërkurën e javës që vjen në mbledhjen e parë të Këshillit bashkiak për 2018-ën.
- VENDIMET
Të mërkurën e javës që vjen do të marrin OK një sërë vendimesh me impakt social për qytetarët e Tiranës, që nga ofrimi i palestrave shkollore për përdorim të jashtëm si dhe bibliotekave, që do të shërbejnë si qendra multifunksionale, që mund të shfrytëzohen në çdo kohë. Po ashtu, listës së përfituesve të ndihmës ekonomike i janë shtuar edhe 16 emra, të cilët marrin nga 1600 deri në 3 mijë lekë të rinj.
Të tjera ndryshime stacionesh kanë pësuar sërish linjat urbane duke ofruar një mbulim më të gjerë. Po ashtu, një linjë e re e quajtur “Linja e gjelbër” do të futet në qarkullim për të integruar disa pika kyçe të kryeqytetit: pallatin me shigjeta, zonën e Brrylit, Farmacinë 10, ish-stacioni i trenit, sheshin “Karl Topia” dhe sheshin “Shqiponja”.
Përpos masave të ndërmarra deri më tani për strehimin e komunitetit rom dhe egjiptian, Bashkia ka hartuar një dokument voluminoz ose një plan veprimi për zhvillimin dhe integrimin e tyre.
Gjithashtu, Bashkia ka bërë gati kërkesën me një sërë pasurish me aktivitet social, kulturor, ekonomik dhe arsimor nën juridiksionin territorial dhe administrativ të saj për transferim përfundimtar të tyre nga Këshilli i ministrave.
