Në Britaninë e Madhe po aplikohet një mënyrë e re për të “spastruar” vendin nga kriminalët, të mbërritur aty nga vendet e tjera.
Është prishur rregulli që pas dënimit ish-të burgosurve u jepej një shans i ri për t’u rehabilituar dhe inkuadruar në shoqërinë britanike.
Mediat vendase kanë njoftuar së fundmi, se menjëherë pasi kanë kryer dënimin e tyre, Britania e Madhe, dëboi 21 shtetas shqiptarë.
Mes tyre, janë edhe disa trafikues droge e gangster të armatosur. Në total, ata kanë vuajtur më shumë se 75 vjet burg në Britani dhe dje u nisën drejt Tiranës.
Mes atyre që ishin në fluturim ishte edhe Arjon Hyseni, 30 vjeç, që u burgos për tetë vjet për trafik kokaine. Po ashtu, pjesë e të dëbuarve është edhe Agim Isufi, 19 vjeç, që vuajti 20 muaj heqje lirie për një fabrikë kanabisi.
“Këta kriminelë të huaj të rrezikshëm nuk kanë vend në shoqërinë tone”, tha Sekretarja e Brendshme, Priti Patel.
Dhjetëra të huaj të tjerë të dënuar për krime në Britani pritet të kthehen brenda disa javësh në vendet e origjinës.
