Dalin rezultatet paraprake të ekspertizës për vdekjen e 44-vjeçarit Andon Mëhillaj i dënuar me burg përjetë. Mëhillaj u gjet i vdekur në burgun e Peqinit, ndërsa familja ngriti dyshimet për shkaqet e vdekjes duke akuzuar autoritetet e burgut.
“Vdekje e menjëhershme për shkaqe ende të pasqaruara! Do pritet rezultati përfundimtar i autopsisë pas 29 ditësh”, thuhet në raportin paraprak.
Mëhillaj, i njohur ndryshe si kapoja i “Bandës së Tritolit” në Vlorë, ishte dënuar me burg përjetë si anëtar i bandës së vrasësit me pagesë Julian Sinanaj.
Në 2014 ai u vetëdorëzua në policinë e Vlorës, pasi ishte shpallur në kërkim si pjesë e kësaj bande famëkeqë, pas të cilës fshihen disa vrasje dhe jo vetëm. Mëhillaj u akuzua se ishte sekseri që ndërmjetësonte ‘pazaret’ mes biznesmenëve dhe Julian Sinanajt, duke bërë rolin e negociatatorit. Po ashtu pjesë e bandës ishte dhe kushëriri i tij, Genis Mëhillaj, i cili figuronte në faqen e Interpolit si person në kërkim për “Akte terroriste” dhe “Financim të terrorizmit”.
Por Mëhillaj nuk i kishte pranuar asnjëherë akuzat dhe dje avokati i tij Edmond Dema tha se ishte një njeri normal, që çedoi për shkak të një problemi me pronat por jo kriminel dhe se nuk kishte prekur armë me dorë.
Dema rrëfeu për gazetarin Enrik Mehmeti kishte tentuar dy herë vetëvrasjen në burg, njëherë me dozë të tepërt të ilaçeve që merrte për depresion dhe një herë tjetër duke prerë damarët.
