Vdekja e 4 rusëve në hotelin në Qerret të Kavajës mbetet ende një mister. Sergey Burenkov, 60 vjeç, bashkëshortja Natalya Burenkova, 58 vjeç, së bashku me vajzën e tyre Katia, 31 vjeç dhe partnerin e saj Nikita Belousov, kishin ardhur për pushime në Shqipëri.
Sipas dëshmisë së punonjësve të hotelit në Kavajë, rusët kishin kërkuar të shkonin në sauna dhe diçka për të ngrënë e pirë.
Kur askush nuk po e hapte derën e saunës, u gjetën trupat e pajetë. Uji i pishinës është dërguar për ekzaminim, pasi dyshohet se kishte shumë klor.
Për median ruse Kuryer Sreda, ka folur Anastasia, mikesha e 60-vjeçarit.
“Punonim së bashku. Jam e shokuar. Diçka i ka ndodhur, jam e sigurt që ata nuk mund të mbyteshin apo të helmoheshin njëkohësisht.
Dikush do të lëvizte apo duhej të rrëzohej, por ata qëndronin ulur në vendet e tyre. Po shkruhen gjëra pa kuptim, ndoshta nuk e marrim vesh kurrë se si vdiqën,” thotë ajo.
