Policia e Tiranës ka bërë disa arrestime orët e fundit, mes tyre edhe një 24 vjeçar që ka dhunuar një mjek në krye të detyrës.
“Specialistët për Hetimin e Krimit në Komisariatin e Policisë Nr.4, bënë arrestimin në flagrancë të shtetasit L. B., 24 vjeç, pasi për shkak të detyrës ka goditur mjekun e një spitali.”, njofton policia.
Ndërkohë, përmes një njoftimi zyrtar, policia njofton se ka arrestuar autorin e plagosjes së një 19 vjeçari, i cili ndodhet jashtë rrezikut në spital.
“Nga specialistët për Hetimin e Krimit në Komisariatin e Policisë Nr.5, u bë arrestimi në flagrancë i shtetasit F. S., 20 vjeç, pasi pas një konflikti për motive të dobëta ka goditur me thikë shtetasin A. Gj., 19 vjeç, i cili ndodhet në spital, jashtë rrezikut për jetën.”, njofton policia.
Në pranga ka rënë edhe një i ri që u kap me kokainë si dhe një tjetër që dhunonte bashkëjetuesen e tij.
“Specialistët e Seksionit për Hetimin e Narkotikëve bënë arrestimin në flagrancë të shtetasit Xh. V., 26 vjeç, pasi gjatë kontrollit të ushtruar në mjetin me të cilin ky shtetas qarkullonte iu gjet dhe iu sekuestrua një armë e ftohtë (thikë) dhe një sasi me lëndë të dyshuar kokainë.
Nga specialistët për Hetimin e Krimit në Komisariatin e Policisë Nr.1, u bë arrestimi në flagrancë i shtetasit A. V., 33 vjeç, pasi ka ushtruar dhunë fizike dhe psikologjike ndaj bashkëjetuses së tij”
Edhe policia rrugore raportohet se ka arrestuar dy shoferë, për shkelje të rregullave të qarkullimit.
“Specialistët e Qarkullimit Rrugor bënë arrestimin në flagrancë të shtetasve :
S. H., 26 vjeç, pasi u kap duke drejtuar mjetin në gjendje të dehur në masën 0.74 mg/l ; E. F., 21 vjeç, pasi u kap duke drejtuar mjetin pa lejen përkatëse.”
Materialet i kaluan Prokurorisë së Rrethit Gjyqësor Tiranë, për veprime të mëtejshme. /Gazeta SHQIP