Ish-Komandanti i Forcës së Sigurisë së Kosovës, Kadri Kastrati, ka deklaruar në emisionin “Interaktiv” të KTV-së se ushtria e Kosovës mund të jetë tërësisht gati vetëm në vitin 2025.
Ndonëse plani strategjik parasheh se një gjë e tillë do të bëhet për dhjetë vjet, Kastrati ka thënë se Kosovës, që të ketë kapacitete të plota operacionale e ushtarake, do t’i duhen edhe 7 vite të tjera.
“Para dy viteve kam rekomanduar publikisht dhe kam këshilluar institucionet që të fillojnë të bisedojnë me partnerët tanë, sidomos SHBA-në e vendet e NATO-s, sepse qysh atëherë është parë se Lista Serbe s’është e gatshme të votojë jo vetëm për Ushtri me ndryshime kushtetuese, por për asnjë veprim që e çon Kosovën përpara. Më në fund e pamë që partnerët strategjikë, NATO, u bind që serbët nuk i votojnë ndryshimet dhe dhanë leje për ndryshime ligjore. Emrin nuk e ndryshojmë, por mandati dhe detyrat do të jenë ushtarake e Kosova do të ketë ushtrinë e vet”, ka thënë ai.
“Kur është bërë rishikimi strategjik është paraparë një plan si të zhvillohet. Qysh në atë kohë janë bërë studimet në bashkëpunim me partnerin tonë, SHBA-në. Atëherë është paraparë që ky plan i zhvillimit të zgjasë diku rreth 10 vjet. Por pasi jemi vonuar dhe tashmë kemi kapacitete njerëzore, buxhetore, rekomandoj që ky zhvillim të mos zgjasë më shumë se shtatë vite. Ushtria mund të jetë e gatshme më 2025 me të gjitha aktivitetet operacionale dhe mund të marrë pjesë në misione paqeruajtëse”, ka shtuar Kastrati.
Ish-Komandanti i Forcës së Sigurisë së Kosovës, Kadri Kastrati
Sipas ish-Komandantit të Forcës së Sigurisë së Kosovës, emri i FSK-së nuk e dëmton aspak rolin e kësaj force. Por sipas tij, NATO nuk e pranon këtë ushtri pikërisht për shkak të emrit.
Kastrati ka shpjeguar më tej se roli i FSK-së do të jetë mbrojtës dhe do të ketë armatim për mbrojtje e jo armatime sulmuese.
“S’do të ketë tanke e aviacion luftarak sepse janë armatime sulmuese, por do të ketë gjithë kalibrat e tjera mbrojtëse. Besoj që qeveria do t’i kalojë gjithë fazat për të siguruar mjetet e nevojshme për armatim adekuat.”
Ai ka folur edhe për largimin e dhjetëra pjesëtarëve të FSK-së nga komuniteti serb. Sipas tij, kjo është bërë për shkak të presioneve politike nga Serbia dhe liderët serbë në Kosovë.
