Presidenti i Shteteve të Bashkuara, Donald Trump, ka urdhëruar Komandën Qendrore të SHBA-së të nisë sulme ushtarake kundër Iranit, si kundërpërgjigje për vrasjen e dy ushtarëve amerikanë në një bazë ushtarake në Jordani.
Sipas zyrtarëve amerikanë, për gati një javë forcat amerikane kanë kryer sulme të përditshme ndaj objektivave dhe infrastrukturës ushtarake, kryesisht në jug të Iranit, në zonën pranë Ngushticës së Hormuzit.
Mediat ndërkombëtare raportojnë se presidenti Trump ka paralajmëruar një përgjigje të ashpër ndaj Teheranit, duke deklaruar se “portat e ferrit do të hapen” kundër Iranit.
Në të njëjtën kohë, Departamenti Amerikan i Shtetit ka lëshuar një paralajmërim global për sigurinë, duke u bërë thirrje qytetarëve amerikanë, veçanërisht atyre që ndodhen në Lindjen e Mesme, të tregojnë kujdes të shtuar për shkak të rrezikut të një përshkallëzimi të mëtejshëm të konfliktit.
“Mjedisi i sigurisë mbetet kompleks, me mundësinë e një përshkallëzimi të paparashikueshëm. U kujtojmë qytetarëve amerikanë nevojën për vigjilencë të vazhdueshme. Objektet diplomatike të SHBA-së, përfshirë ato jashtë Lindjes së Mesme, janë shënjestruar dhe grupet që mbështesin Iranin mund të godasin interesa amerikane ose objektiva të lidhura me Shtetet e Bashkuara në mbarë botën”, thuhet në njoftimin e Departamentit të Shtetit.
Përshkallëzimi vjen pasi dy ushtarë amerikanë u vranë të premten në Jordani gjatë një sulmi me raketa dhe dron, që sipas autoriteteve amerikane u krye nga Irani.
Një ushtar tjetër rezulton i zhdukur në veprim, ndërsa katër ushtarakë u plagosën dhe u trajtuan në spitalet jordaneze, ku më pas u liruan. Ushtarë të tjerë që pësuan plagë të lehta janë rikthyer në detyrë.
Situata mbetet tepër e tensionuar, ndërsa komuniteti ndërkombëtar po ndjek me shqetësim zhvillimet, nga frika se konflikti mund të zgjerohet në të gjithë rajonin e Lindjes së Mesme.
