Autoritetit i Komunikimeve Elektronike dhe Postare ka bërë së fundmi një analizë të tregut të telefonisë fikse duke pasur në fokus nismën e marrë disa vite më parë për reduktimin gradual të tarifave të terminimit të thirrjeve.
Por situata e tregut duket se e ka bërë institucionin të rishikojë planin për uljen e mëtejshme të tarifave e cila parashikonte që në 1 janar 2018 reduktonte me të paktën 46 për qind ato ekzistuese.
Nga 1.29 lekë për minutë që është aktualisht tarifa, ajo pritej që të shkonte në 0.70 lekë për minutë në telefoninë fikse. Propozimin e ri AKEP e ka nxjerre per konsultim publik.
“Siç mund të vihet re nga tabela e mësipërme reduktim i parashikuar në 1.01.2018 parashikon reduktim me 46% të FTR të të gjithë operatorëve te rrjeteve fikse si dhe të tranzitimit të Albtelecom.
Kjo përbën një reduktim të konsiderueshëm edhe të të ardhurave nga terminimi për të gjithë operatorët e rrjeteve fikse dhe në kushtet specifike të Shqipërisë për rrjetet fikse (shumë rrjete fikse dhe në madhësi shumë më të vogël se vendet e BE-së, pra me ekonomi shkalle shumë të kufizuar) përbën një reduktim jo-proporcional” thuhet në dokumentin e AKEP.
Nën këtë argument Autoriteti vlerëson se duhet të shtyhet aplikimi i reduktimit të parashikuar më 1.01.2018 duke vijuar me tarifat aktuale te terminimit (të të gjithë operatorëve të rrjeteve fikse) dhe tranzitimit të Albtelecom, deri në afatin e përcaktuar në vendimet përkatëse që AKEP do të marrë pas këshillimit publik dokumentit.
Ulja e re e propozuar dhe afatet
Duke parashtruar si variant shtyrjen e afatit për reduktimin e tarifave në telefoninë fikse AKEP ka propozuar një skemë të re që rrit numrin e fazave dhe afatin e zbatimit.
Kështu nga 1 shtatori 2018 propozohet që tarifat të ulet nga 1.29 lekë për minutë në 1 lekë për minutë, një reduktim ky me 23 për qind. Kurse faza e dytë e reduktimit të hyjë në fuqi në 1 janar 2019 duke çuar këtë tarife në 0.70 lekë për minutë.(monitor)
