Klubi i Skënderbeut është dënuar me 60 mijë euro nga UEFA, për koret raciste në ndeshjen e fundit ndaj Partizanit të Beogradit, dhe me 1 ndeshje pa tifozë në shtëpi.
Në vendimin e publikuar nga qeveria e futbollit europian, korçarët dënohen për fyerjet e tifozëve në “Elbasan Arena”, në ndeshjen që u mbyll 0-0 me serbët e Partizanit.
Sipas vendimit të Komisionit të Disiplinës së UEFA-s, korçarët do ta luajnë ndeshjen e fundit në shtëpinë e tyre ndaj Dinamos së Kievit pa mbështetjen e tifozëve, në një “Elbasan Arena” të boshatisur.
Befasia
Në fakt, ky lajm ka ardhur në mënyrë të befasishme në kampin korçar. Edhe vetë serbët mbetën të surprizuar nga organizimi në “Elbasan Arena, aq sa presidenti i Partizanit të Beogradit dhe trajneri deklaruan se shpresonin që mikpritjen t’ua shpërblenin në ndeshjen e kthimit.
Apelimi
Sapo është njohur me dënimin disiplinor, klubi korçar ka kërkuar nga komisioni vendimin e argumentuar, sepse realisht në “Elbasan Arena” nuk ka patur probleme të tilla.
Nga ana e klubit juglindor pritet që të bëhet ankimimi në Komisionin e Apelit të UEFA-s për heqjen e gjobës dhe ndëshkimit të tifozëve.