Një 21-vjeçar është kapur në flagrancë nga policia teksa udhëtonte me makinë i armatosur me pushkë.
Gerald Qordja u ndalua nga shërbimet e Policisë, teksa lëvizte me një automjet tip “Audi”, te kryqëzimi i Valiasit.
“Në vijim të punës intensive, për identifikimin e shtetasve që posedojnë armë dhe cenojnë rendin dhe sigurinë e qytetarëve, shërbimet e Komisariatit të Policisë Nr. 5 finalizuan operacionin “Kryqëzimi”, gjatë të cilit u vu në pranga shtetasi G. Q., 21 vjeç, banues në Babrru”,- njofton policia.
Në total, nga kontrollet në automjetin dhe në banesën e 21-vjeçarit, u gjetën 1 armë zjarri pushkë me municion, 1 thikë, pranga si të policisë dhe 1 kapuç për maskim.
Materialet procedurale iu referuan Prokurorisë së Tiranës, për veprime të mëtejshme.
