Shqiptarja.com zbardh detaje të reja nga procesi gjyqësor sot në Korçë ku Zani Caushi u tërhoq nga kërkesa për lirimin me kusht. Në një kohë kur Myrteza Caushi, në muajin Maj 2020 iu drejtua gjykatës së Korçës me një kërkesë për lirim me kusht, njëherësh ai depozitoi në sekretarinë e gjykatës dhe një kërkesë të dytë, për të kundërshtuar një masë disiplinore që Drejtoria e Burgut Drenovë kishte marrë për të. Kjo masë disiplinore që Zani Caushi ka marrë, daton në muajin Prill 2020 për shkak se Zani është konfliktuar dhe ka krijuar një situatë rebelimi në burgun e Drenovës në Korçë. Kjo kërkesë e Zani Caushit për kundërshtimin e masës disiplinore është në proces shqyrtimi nga gjyqtarja e Korçës, Ariola Kristo.
Të njëjtën situatë rebelimi “i forti” i Vlorës, ka zhvilluar dhe ditën e sotme në ambientet e Gjykatës së Korçës, ku pasi palët kanë dhënë parashtrimet e tyre, Zani Caushi, ka filluar të konfliktohet me përfaqësuesen e akuzës, duke e akuzuar dhe provokuar këtë të fundit, se “…pse ke dhënë konferencë për shtyp…”. Me këtë argument Zani Çaushi është shprehur se qëndrimi i prokurorisë, ka qenë i paracaktuar në këtë çështje dhe padyshim edhe qëndrimi i gjykatës, do ishte i tillë për të rrëzuar kërkesën e tij. Nisur nga kjo situatë në kulmin e debatit të ndërsjelltë mes prokurores së çështjes dhe Zani Caushit, ky i fundit dhe avokati i tij ish-gjyqtari Arben Lera, kanë vendosur të tërhiqen nga kërkesa e tyre për “Lirim me Kusht”.
Tërheqja e tyre, ka ardhur në një moment kur gjyqtari Selaudin Pysqyli, do tërhiqej për të dhënë vendimin. Mirëpo në kushtet kur pala kërkuese është tërhequr nga kërkesa për “Lirim me Kusht”, gjykata procedoi me pushimin e çështjes. Report Tv ka siguruar kërkesën e Myrteza Caushit, drejtuar gjykatës së Korçës në datën 14 maj 2020. Dokumenti përbëhet nga vetëm një fletë ku i kërkon gjykatës të vihet në lëvizje për të kërkuar “Lirimin me Kusht” të Myrteza Caushit, duke u mbështetur në nënin 65 të Kodit Penal. Avokati mbrojtës i Zani Caushit, bën me dije se klienti i tij ka të drejtën e paraqitjes së kërkesës së tij pasi ka qenë 31 vite në burg. “…nuk ishte e parashikuar nga ana ime, ishte një veprim që u mor në momentin e fundit. Në lidhje me tërheqjen e kërkesës, ka të bëjë me llogaritjet e viteve të burgimit.
Normalisht veprimi i ligjit penal është në kohë, nëse Zani Caushi është dënuar në vitin 2000 atëherë aplikohet ligji i atij viti dhe jo i vitit 2020. Që tregon se lirimi me kusht në vitin 2000 ka qenë me 25 vite…”. Por sipas prokurorisë së Korçës, Myrteza Caushi është një i dënuar përsëritës, pasi është dënuar mbi 3 herë për akuzën e “Futjes dhe Mbajtjes në ambientet e burgut të sendeve të palejuara”. Kriter ky që e pengon Zani Caushin për të përfituar lirimin me kusht nga burgu, pasi ky i dënuar konsiderohet si i parehabilituar. Për më tepër që në muajin prill 2020 ndaj Myrteza Caushit, është vendosur një masë disiplinore nga Drejtoria e Burgut Drenovë, për shkak të një revolte brenda në burg. Kjo bën që ky i dënuar të humbë kriterin e rehabilitimit.
