Ka shpallur dhjetëra vendime fajësie dhe pafajësie gjatë karrierës së tij si pjesë e drejtësisë, të nisur në vitin 1992. Tashmë ish-gjyqtari i Lartë, Admir Thanza do të provojë të ulet në bankën e të akuzuarve.
Prokuroria e Tiranës mbylli hetimet për ish-gjyqtarin e lartë e po ashtu ish anëtar i Gjykatës Kushtetues dhe e dërgoi atë të pandehur, pas gjetjeve të ONM gjatë procesit te vettingut që e shpalli Admir Thanzën të papërshtatshëm për drejtësisë.
Prokuroria e Tiranes e dërgoi të pandehur në Gjykatë ish-gjyqtarin e karrierës Thanaza nën akuzën e falsifikimit të formularëve të dekriminalizimit.
50 vjeçari do të gjykohet për zbulimin e ONM , në të cilin rezulton i dënuar nga Gjykata italiane me 40 ditë burgim për vjedhjen e një supermarketi.
Ky verdikt i shpallur në 1999 nga gjyqtaret e Pizës që ishte konvertuar në dënim me kusht, është fshehur si fakt në formularët e dekriminalizimit, gjatë kohës që ai ushtronte detyrën e gjyqtarit të lartë.
Ish gjyqtari që ka qenë në krye të kupolës së drejtësisë për vite me radhë ndoqi të njëjtën vijë mbrojtjeje edhe para komisonerëve edhe para prokuroreve që e hetuan. Ai këmbëngul se nuk ka vjedhur asnjëherë në jetën e tij dhe se e kishte pranuar këtë ngjarje për humanizëm, për të shpëtuar nipin e tij.
Për shkeljen e dyte atë të mos deklarimit në formular, Thanza pretendon se posedon një dëshmi penaliteti të pastër dhe se nuk ka fshehur asnjë krim.
Sidoqoftë alibia e fundit mbetet e vështirë për t’u besuar, përderisa shteti italian e konfirmoi me letër porosi ngjarjen për të cilën, njeriu që mbante çekiçin e drejtësisë, ishte shpallur fajtor 20 vite më parë.
