Një burrë dhe një grua janë gjobitur me nga 450 euro nga Policia e Kosovës, të mërkurën pak pas mesnatës ishin puthur në afërsi të një klubi të natës në Prishtinë. Ky dënim nxiti shumë reagime e në media u raportua si skandaloz. Avokati i burrit të dënuar thotë se janë shkelur të Drejtat e Njeriut dhe se Kosova nuk është në Lindjen e Mesme. Ehat Miftaraj nga IKD thotë se sjellja e çiftit para klubit të natës nuk mund të konisderohet në kundërshtim me ligjin. Policia nuk është përgjiigjur.
Në fletparaqitjet e gjobave të shqiptuara, të cilat i posedon Gazeta Express, nuk ceket mënyra sesi çifti janë puthur vetëm shkruan se “i njëjti /e njëjta bënë sjellje të pahijshme duke u puthur në publik edhe pse i është tërhequr vërejtja disa herë“.
Lidhur me këto gjoba ka folur për Express avokati i mërgimtarit Edis Kuraja.
“E kam klient për shkak të çështjeve civile të mëhershme edhe mandej ka qenë i shqetësuar për rastin që ka ndodh…Të dy janë gjobitur me nga 450 euro, unë e mbroj klientin mashkull, por ata kanë dashtë me qenë anonim për publikun dhe ka nënshtetësi suedeze. Ata bashkëjetojnë”, u shpreh Kuraja për Gazetën Express.
Avokati thotë se nuk ka ushtruar ankesë në Inspektoratin Policor, pasi po pret që IPK të iniciojë vetë procedurën.
“Ndaj zyrtarëve policorë nuk kam ushtruar ndonjë ankesë, pasi ata kur e kuptojnë se zyrtari i tyre ka vepruar në mënyrë të kundërligjshme kur ka shqiptuar gjobën në fjalë, ata mund të iniciojnë procedurën vetë….Do të presim si do të veprojë Policia e Kosovës, respektivisht shteti ndaj klientit tim dhe nëse nuk zbaton ligjin do të përdori mjete tjera juridike, derisa ai vendim nuk anulohet sepse është në kundërshtim me dispozitat ligjore. Shteti i Kosovës është europian nuk jemi në Lindjen e Mesme, ku këto veprime sanksionohen.
