“Arrest me burg” u dha sot nga Gjykata e Fierit për një nga autorët e tentativës së grabitjes së ndodhur disa ditë më parë.
Arben Muça 37-vjeç, mbeti i plagosur pas shkëmbimit të zjarrit me policinë, ku mbeti i vrarë edhe një autor tjetër.
Për 37 vjeçarin Muça masa e sigurisë u dha në mungesë pasi ai ndodhet ende në spitalin rajonal të Fierit.
Pasi u mor vendimi në gjykatë, përfaqësues nga ky institucion shkuan dhe ia komunikuan në ambientet e spitalit aty ku vijon të qëndrojë nën kujdesin e mjekëve autori.
Ky i fundit, sic bëhet e ditur nga hetimi, edhe pse vetë nuk arrin të flasë, për avokatin të cilin e ka caktuar gjykata, mësohet të ketë thënë se është shumë i tronditur.
“Nuk mbaj mend asgjë se cfarë ka ndodhur. Nuk me kujtohet asnjë detaj dhe nuk di se si kam ardhur këtu. Se mbaj mend as të kem tentuar të vjedh, asgjë. Jam shumë i tronditur psikologjikisht”, kaq mësohet se ka arritur të thotë me mundim i arrestuari.
Pyetjes nëse bashkë me të ka qenë edhe i vëllai dhe kunati, Muca ka hezituar ti përgjigjet, duke stimuluar mospërqëndrim në bisedë dhe e ka anashkaluar si pyetje.
Ndërkohë edhe pse familajrët e tij janë njoftuar për masën e vlerësimit, askush prej tyre nuk ka pranuar të jetë prezent gjatë zhvillimit të seancës gjyqësore.
Mjekët nga ana tjetër kanë thënë se autori i dyshuar ka kaluar rrezikun dhe gjendja e tij po përmirësohet gradualisht. Në ambientet e spitalit, në dhomën e izolimit Muca mbahet nën masa të rrepta sigurie, duke u klasifikuar si person me rrezikshmëri të lartë.
Mjekët kanë hedhur dyshime se Muca mund të improvizojë si i sëmurë rëndë, për arsye që ende nuk dihen, por sipas tyre parametrat shëndetësorë po normalziohen dhe ai ka një gjendje relativisht të mirë.
Arben Muca mbeti i plagosur gjatë një shkëmbimi zjarri me policinë e Fierit. Ky së bashku me tre persona të tjerë tentuan të grabisnin një shtëpi në këtë qytet, por pasi pronarët ndien zhurma lajmëruan policinë.
Me të mbërritur në vendin e ngjarjes forcat e policisë hasën në rezistencë nga autorët, ndërsa si shkak i shkëmbimit të zjarrit 20-vjeçari nga Elbasani Xhuljano Sollaku mbeti i vrarë.
Bashkëpunëtori i tij, Arben Muça u plagos, dy persona të tjerë janë shpallur në kërkim nga policia.
