Gazetari i njohur Artan Hoxha ka deklaruar sot se ish-drejtuesi i Prokurorisë së Elbasanit, i komanduar pak kohë më parë nga Kryeprokurorja e Përgjithshme e Përkohshme, Arta Marku, nuk e ka dhënë dorëheqjen me dëshirë, por ka pasur trysni të mëdha për dosjet e bujshme që po hetonte.
Gjatë intervistës së tij në emisionin “Kjo Javë” në News 24, Hoxha tha se Ardian Nezha guxoi të hapë dosje të bujshme të klaneve kriminale në qytetin e Shqipërisë së mesme, siç është klani Capja, por edhe të ngjarjeve të tjera kriminale që kanë lënë gjurmë.
“Nezha nuk është e vërtetë që është vetëdorëhequr, komandimet bëhen për 4 muaj, se prokurorja e re s’mund të bëje emërime. Në rastin konkret mandati i komandimit të prokurorit të Elbasanit u ndërpre.
U deklarua që u vetëdorëhoq nga Prokuroria e Elbasanit më tepër për të gjetur një zgjidhje për të mos krijuar probleme në opinionin publik dhe prokuroria mos të merrte ngarkesa mbi vete se po lëvizte prokurorin kryesor që ka kryer deri tani hetime shumë të rëndësishme.
Në dijeninë time ai s’është dorëhequr, e kanë dorëhequr. Sot është në Tiranë, është sjellë pas shumë vitesh, u kërcenua? Di që ka pasur trysni të jashtëzakonshme për hetimet që po kryente”.
