Ergys Isufi, kandidati për deputet i Nismës Shqipëria Bëhet, u ndalua një ditë më parë nga policia, pasi gjatë një kontrolli iu gjet një dozë kokainë.
Burimet thanë se Isufi, i cili udhëtonte drejt Borshit për një miting elektoral, u lirua nga ambientet e Policisë së Sarandës rreth orës 22:00 të mbrëmjes së 7 majit.
Policia nuk ka dalë ende me një deklaratë zyrtare lidhur me ndalimin e tij dhe nuk ka dhënë informacion nëse ndaj tij është ngritur akuzë.
Detajet e ngjarjes
Isufi, i shoqëruar nga një person tjetër i mitur, ishte ndaluar teksa udhëtonte nga Saranda drejt Borshit. Gjatë kontrollit, ai tentoi të largohej, por u ndalua dhe u neutralizua nga forcat e policisë. Burimet e raportuan se ai kishte me vete një dozë kokainë, për të cilën dyshohet se ishte për përdorim vetjak.
Njëkohësisht, policia ka ushtruar kontrolle edhe në banesën e Isufit, por sipas informacioneve, nuk është gjetur asnjë send tjetër që të jetë në kundërshtim me ligjin.
Shtabi elektoral i Nismës Shqipëria Bëhet ka reaguar, duke e cilësuar ngjarjen si një inskenim për të dëmtuar imazhin e partisë.
Ata kanë theksuar se sondazhet e fundit e rendisin forcën politike të udhëhequr nga Adriatik Lapaj si “forcë të parë” në qytet, duke sugjeruar se ngjarja mund të ketë si qëllim dëmimin e fushatës.
