Një i ri suedez u kap në tentativë për të trafikuar 19 armë, pistoleta, drejt vendeve të BE-së.
Zbulimi u bë në Pikën Kufitare të Muriqanit, në vijën e dytë të kontrollit, teksa në çantë iu gjetën armët.
Sipas Policisë, Sebastian Vall, 21 vjeç, po udhëtonte në autobusin e linjës Kosovë-Gjermani.
Ndërkaq, Policia po heton nëse i riu ka udhëtuar nga Kosova apo autobusi ka marrë pasagjerë edhe në Shqipëri.
Policia bëri të ditur se krahas masave për përballimin e fluksit, krijimin e lehtësirave ligjore me qëllim shmangien e radhëve dhe ofrimin e një shërbimi sa më cilësor e në kohë për turistët dhe gjithë pushuesit që vijnë në Shqipëri për sezonin veror, shërbimet e Policisë Kufitare Muriqan kanë rritur edhe kontrollin në drejtim të parandalimit dhe goditjes së paligjshmërisë, kryesisht trafiqeve të paligjshme që mund të kryhen, duke përfituar nga fluksi i madh.
Si rezultat i shtimit të kontrolleve, duke përdorur edhe qentë antidrogë dhe antieksplozivë, është bërë e mundur që të konstatohet dhe goditet rasti i djeshëm i trafikimit të armëve të zjarrit.
“Shërbimet e Policisë Kufitare në PKK Muriqan, bënë arrestimin në flagrancë të shtetasit Sebastian Vall, 21 vjeç, banues në Suedi. Në PKK Muriqan në dalje, gjatë kontrollit të detajuar në vijën e dytë, në çantën e 21- vjeçarit suedez, i cili udhëtonte si pasagjer në autobusin e linjës “Kosovë -Gjermani”, u gjetën dhe u sekuestruan në cilësinë e provës materiale 19 armë zjarri tip “pistoletë”, kalibër 7.65.
Veprimet po vijojnë nga specialistët e Departamentit të Policisë Kriminale dhe të Policisë Shkodër për zbardhjen dhe dokumentimin e plotë të këtij rasti të trafikut të armëve.
Materialet do t’i referohen Prokurorisë së Rrethit Gjyqësor Shkodër për veprën penale “Trafikimi i armeve dhe i municionit”, parashikuar nga neni 278/a i Kodit Penal”, thuhej në njoftimin e djeshëm të Policisë së Shkodrës. I riu tashmë po merret në pyetje për të zbuluar edhe persona të tjerë të implikuar në trafikun ndërkombëtar të armëve.
