Administratori i një kompanie private që u grabit dje në Tiranë, ka dëshmuar në polici se mbante me vete 25 mijë euro, kur 2 grabitësit i kanë marrë qesen me valutë që do të dorëzonte në bankë. Nga ana tjetër mësohet se njëri nga autorët mbante pistoletë në dorë dhe e qëlloi me tytën e saj.
Menaxheri i kompanisë private që u grabit ditën e djeshme në Tiranë teksa shkonte në bankë me një qese me para ka deklaruar në polici se autorët i morën 25 mijë euro.
Referuar dëshmisë së 40-vjeçarit, në orën 15.00 të ditës së mërkurrë ai po dorëzonte valutën pranë bankës së nivelit të dytë që ndodhet në zonën e “Komunës së Parisit”, kur 2 grabitësit i zunë pritë.
Spahiu ka dëshmuar se i kishte pikasur grabitësit, teksa e ndiqnin me një motorr, tip “Papaq”, por nuk e dinte që ata kishin për qëllim ta grabisnin. Në momentin kur po dorëzonte paratë, njëri prej autorëe e priste jashtë dhe e kërcënoi për t’ia dhënë qesen me para.
Burimet policore shtojnë se nga kqyrjet e kamerave të sigurisë së bizneseve aty pranë rezulton se njëri prej grabitësve mbante në dorë një pistoletë. Pasi e kërcënoi menaxherin për t’i dhënë qesen me para, ai e qëlloi me tytën e pistoletës, për t’u larguar më pas me bashkëpunëtorin që e priste në motorr.
Në lidhje me identitetin e autorëve, administratori i kompanisë tha se nuk kishte mundur t’i identifikonte, sepse kishin kapuçë, ndërsa mbanin skafandara dhe doreza.
