Ish-ministrja e Mbrojtjes, Mimi Kodheli ka folur pas përfundimit të takimit që zhvilloi presidenti Ilir Meta me anëtarët e Komisionit të Politikës së Jashtme në lidhje me ecurinë e negociatave me Greqinë. Kodheli falënderoi Metën për informimin dhe tha se është rënë dakord që nëse arrihet marrëveshja ajo nuk duhet të dështojë më vonë.
“Dua të falënderoj presidentin për informimin dhe që na priti për këtë çështje. Ne ramë dakord me presidentin që kjo marrëveshje te mos dështojë në një kohë që jemi afër çeljes së negociatave. Negociatat duhet të jenë në të mirë të dy vendeve dhe në të mirë të shqiptarëve. Ne kemi një eksperiencë negative në këtë çështje, pasi Gjykata Kushtetuese hodhi poshtë marrëveshjen e vitit 2009”- tha Kodheli.
E pyetur nga gazetarët nëse janë diskutuar me presidentin Meta emrat e negociatorëve, konkretisht për emrin e kontestuar nga opozita Artur Mecollari, ish ministrja e mohoi.
“Nuk diskutuam për çështjet e negociatorëve dhe emrat që bëjnë pjesë. Grupi i negociatorëve është prezantuar tek presidenti. Grupit të negociatorëve mund t’i bashkohen edhe profesorë edhe ekspertë në rolin e këshilltarëve”- tha Kodheli.
