Pedagogu Jani Marka ka folur pas incidentit në protestën e studentëve para Ministrisë së Arsimit.
Në një prononcim për meidan ai ka akuzuar për dhunë ndaj tij, ndërsa i ka bërë thirrje Partisë Demokratike që të tërheqë eksponentët që sipas tij po përçajnë tubimin.
“Unë jam pedagog. Në 1992 kam qenë 12 vite, nga ajo ditë deri sot mund të kem ndërruar disa herë bindjet, por duke u pjekur forcohen idealet.
Unë kam shumë ideale, por ajo që nuk është partiake, është ajo që kanë studentët. Arsim cilësor. Studentëve u duhet të paguajnë 2 mln lekë tarifë. Unë doja të flisja kundër dhunës. Kjo ishte e paparashikueshme, kjo protestë u ka dhënë shpresë shqiptarëve.
Po ushtrohet dhunë e vazhdueshme ndaj nesh. Janë hedhur mbi ne sulme të jashtëzakonshme.
Na akuzojnë se jemi pjesë e një organizate tjetër, jam krenar që jam pjesë e saj. Unë kam protestuar kundër Veliajt, ndërsa na akuzojnë se jemi vegël e tij.
Unë jam dhunuar dhe dola të flas atje kundër dhunës. Na akuzojnë për përçarje, por do ta merrni vesh ku janë. Forumet partiake po përçajnë protestën, por ne do i demaskojmë.
Janë këtu forumet e tyre, partitë. Pse nuk më lanë të flisja, çfarë kam bërë, çfarë kam bërë unë, çfarë dëmi i kam sjellë që zbohem? Do të flisja për problemet e universitetit.
Ne nuk jemi parti. Kemi katër vite si lëvizje për Universitetin, kemi qëllim vetëm universitetin. Protesta uroj që të vijojë, dhe ftoj PD që të tërheqë eksponentët nga protesta” tha ai.
