Vladimir Kurti, një nga personat e arrestuar sot pasi dyshohet se është një nga autorët e grabitjes në Kamëz, nuk është nje emër i panjohur për policinë. Gazetarja Dorjana Bezat raporton për ‘BalkanWeb’ se 28-vjeçari, i cili dyshohet se ka qëlluar me armë ndaj çiftit Buci, ku mbeti i vrarë kryefamiljari Agim Buci dhe mbeti e plagosur gruaja, nuk e ka herën e parë që kryen këtë vepër penale.
Në dhjetor të vitit 2010 ai së bashku me 2 miq të tij kanë marrë një taksist në qendër të Tiranës dhe pasi e kanë çuar në Babrru nën kërcënimin e një thike i kanë marrë atij celularin dhe paratë që kishte me vete. Më pas taksistin e kanë kaluar në sediljen e pasme dhe kur kanë qenë duke ecur makina është përplasur me një shtyllë ku të plagosur mbetën miqtë e Kurtit dhe taksisti.
Policia mbërriti në vendin e ngjarjes dhe arrestoi bashkëpunëtorët e Kurtit, ndërsa ky i fundit arriti të largohej. Kurti u arrestua disa ditë më vonë dhe në 2012 u dënua nga gjykata me 3.4 vite burg. Asokohe ashtu si këtë herë ai u shpreh i penduar dhe bashkëpunoi me autoritetet duke lehtësuar pozitat e tij.
