Për turistët polakë, Shqipëria është një destinacion i rëndësishëm ekonomiko-turistik, që zgjon një interest të vazhduar jo vetëm për bashkëpunime tregtare mes bizneseve, por edhe për ta vizituar dhe bërë pushime.
Ines Muçostepa, Kryetare e Bashkimit të Dhomave të Industrisë dhe Tregtisë, u shpreh sot se, ndër vendet që kanë patur hyrjet më të larta të shtetasve të huaj në Shqipëri, për vitin 2018, Polonia ka patur rritjen më të madhe.
E pranishme në Forumin e 3-të të biznesit Shqipëri-Poloni që u zhvillua sot në Tiranë, Muçostepa tha se, sipas statistikave zyrtare numri i shtetasve polakë që kanë vizituar vendin tonë gjatë periudhës janar-gusht të këtij viti është rritur me 33% krahasuar me të njëjtën periudhë të një viti më pare, duke regjistruar mbi 80 mijë turistë polak që kanë ardhur në vendin tonë.
Ajo ftoi sipërmarrësit polak të pranishëm në këtë takim që të rrisin shkëmbimet turistike me Shqipërinë përmes investime në këtë fushë, nxitur kjo edhe nga politika lehtësuese për të bërë biznes, që ka ndërmarrë qeveria shqiptare për të rritur investimet e huaja në vendin tonë.