Partia Demokratike i ka bere thirrje kryeministrit të tërheqe vendimin për ndërtimin e landfillit në Rrogozhinë dhe ka ftuar qytetarët të vazhdojnë protestat.
Në një deklaratë për mediat bëhet e ditur se një përfaqësi e PD-së, e kryesuar nga deputetët Edmond Spaho, Albana Vokshi morën pjesë në takimin me banorët dhe aktivistë të shoqërisë civile, të cilët kundërshtojnë ndërtimin e landfill-it të mbetjeve në Lekaj-Gosë në bashkinë Rrogozhinë.
Kryetari i grupit parlamentar të Partisë Demokratike, Edmond Spaho, deklaroi se bashkia Rrogozhinë nuk ka respektuar asnjë kriter ligjor për ndërtimin e landfillit dhe se kryetari i saj refuzon të bëjë transparencën e këtij vendimi korruptiv.
Sipas përfaqësuesve të Partisë Demokratike, landfilli po bëhet pa konsultim me banorët dhe nuk ekziston asnjë projekt-dokument. Përfaqësuesit e Partisë Demokratike i bënë thirrje kryeministrit të tërheqë me urgjencë këtë vendim dhe iu bënë thirrje banorëve dhe aktivistëve te shoqërisë civile të vazhdojnë protestat për të mos lejuar ndërtimin e landfillit.
