Demokrati Joe Biden ka paralajmëruar “njerëzit mund të vdesin” nëse administrata e tij për presidencën e ardhshme vazhdon të pengohet nga Donald Trump. Duke iu drejtuar amerikanëve në Delaware, presidenti i zgjedhur tha se ishte i nevojshëm bashkërendimi për të luftuar shpërthimin e Covid-19.
Biden e quajti refuzimin e Trump për të pranuar se ai humbi, pavarësisht thirrjeve për ta bërë këtë nga të dy palët, “krejtësisht të papërgjegjshme”. “Kjo nuk është një lojë,” shkroi ish-zonja e parë Michelle Obama në rrjetet sociale, shkruan newsbomb.al.
Presidenti i zgjedhur Biden ka 306 vota në kolegjin zgjedhor, duke kapërcyer pragun prej 270 të nevojshëm për të fituar. Megjithatë, republikani Trump shkroi në Tëitter të hënën në mëngjes “Unë fitova Zgjedhjet!”
Administrata e Shërbimeve të Përgjithshme (GSA), agjencia qeveritare e ngarkuar me fillimin e procesit të tranzicionit për një president të ri, ende nuk e ka njohur Biden dhe zv.presidenten Kamala Harris si fitues, duke i lënë ata pa qasje në njoftimet e ndjeshme qeveritare që zakonisht ofrohen për një administratë të re.
Ndihmësit e presidentit të zgjedhur Demokrat kanë thënë se refuzimi i Trump për t’u përfshirë në një tranzicion, gjithashtu, do të thotë që ekipi i Biden është përjashtuar nga planifikimi i një strategjie të shpërndarjes së vaksinimit. Në fjalën e tij të hënën, Biden tha për tranzicionin e bllokuar “A e kupton ndokush këtë? Ka të bëjë me shpëtimin e jetëve, në të vërtetë, kjo nuk është hiperbolë”.
“Më shumë njerëz mund të vdesin nëse ne nuk koordinojmë,” shtoi ai.
