Presidenti amerikan Donald Trump e mirëpret marrjen në pyetje nga këshilltari i posaçëm Robert Mueller, i cili drejton hetimin mbi ndërhyrjen ruse në zgjedhjet presidenciale. Zoti Mueller gjithashtu po heton nëse presidenti Trump është përpjekur të pengojë hetimin në fjalë.
Pas raportimeve se këshilltari i posaçëm Robert Mueller do të marrë së shpejti në pyetje presidentin amerikan Donald Trump, ky i fundit ka shprehur gatishmërinë për t’iu përgjigjur çdo pyetjeje.
“Mezi e pres, në fakt,” u shpreh Trump për gazetarët në Shtëpinë e Bardhë, i pyetur për një intervistë të mundshme me zotin Mueller.
“Do të përgjigjesha nën betim,” shtoi më tej Presidenti.
Prokurori i posaçëm Robert Mueller i cili po heton ndërhyrjen ruse në zgjedhjet presidenciale të 2016, gjithashtu po shqyrton nëse Trump është përpjekur të pengojë hetimin në fjalë, me heqjen nga detyra të ish-drejtorit të FBI-së James Comey.
Por Preisdenti vijon ta mohojë këtë pretendim, teksa përsëriti qëndrimin e tij se nuk ka patur asnjë lloj konflikti apo pengese gjatë hetimit që ai e ka cilësuar më parë si “gjueti shtrigash”.
Kujtojmë se në kuadër të këtij investigimi, në pyetje është marrë edhe Prokurori i Përgjithshëm Jeff Sessions, lajm i konfirmuar nga Departamenti amerikan i Drejtësisë më herët gjatë javës.
Gjithashtu, përtej deklaratave mohuese nga Uashingtoni dhe Moska, komuniteti i inteligjencës amerikane ka dalë tashmë në përfundimin se Rusia është përpjekur të ndikojë në zgjedhjet presidenciale në favor të zotit Trump.
