Administrata e presidentit të SHBA-së njoftoi zyrtarisht Donald Trump do të jetë i pranishëm në samitin e NATO-s që do të mbahet më 24 dhe 25 qershor në Hagë, Holandë.
Trump po kërkon me këmbëngulje nga vendet anëtare të NATO-s të rrisin ndjeshëm shpenzimet e tyre për mbrojtjen kombëtare. Në një konferencë për shtyp, zëdhënësja e Shtëpisë së Bardhë, Caroline Levit, bëri me dije se së shpejti do të zhvillohet një bisedë telefonike mes presidentit Trump dhe homologut kinez, Xi Jinping.
Ajo shtoi se Shtetet e Bashkuara po ndjekin me kujdes zbatimin nga Kina të marrëveshjes doganore të muajit të kaluar. Levit theksoi gjithashtu se Trump nuk ishte informuar paraprakisht për operacionin ukrainas “Rrjeta e Merimangës”, ku Ukraina sulmoi bazat ruse në Siberi me dronë për të goditur avionët bombardues me kapacitete bërthamore.
Edhe Ukraina është ftuar në samitin e ardhshëm të NATO-s, ka deklaruar Volodymyr Zelensky. Pritet që mbështetja ushtarake dhe politike për Ukrainën të jetë një nga temat kryesore të samitit.
Lidhur me samitin, presidenti ukrainas ka thënë se “ne u ftuam në samitin e NATO-s. Mendoj se kjo është e rëndësishme”. Zelensky nuk ka specifikuar se kush do ta përfaqësojë në këtë ngjarje Ukrainën.Lideri ukrainas ka bërë thirrje që NATO të ofrojë garanci sigurie për Ukrainën në rast të një armëpushimi ose marrëveshjeje paqeje me Rusinë.
