E marta e 28 tetorit u kthye në një ditë të zymtë për Shqipërinë, pasi në vetëm pak orë u regjistruan tre ngjarje të rënda me pasojë vdekjen në qytete të ndryshme të vendit. Durrësi, Tirana dhe Berati u tronditën nga akte dhune që morën jetën e tre personave dhe lanë pas skena të rënda, familje të shkatërruara dhe një vend të tronditur.
Krimi në familjen në Durrës
Në fshatin Shkallnur të Durrësit, rreth orës 13:00 të kësaj të marte, 25-vjeçari Marjan Kodheli dyshohet se ka vrarë babanë e tij, 69-vjeçarin Pjetër Kodheli, me mjet prerës (thikë).
Sipas fqinjëve, 25-vjeçari sapo ishte kthyer nga emigrimi dhe familja, me origjinë nga Mirdita konsiderohej “e qetë dhe punëtore”.
Nëna e autorit ishte prezente në atë moment dhe ka tentuar t’ia ndalojë, por pa sukses.
Pas ngjarjes së rëndë, autori u arratis për rreth dy orë dhe më pas u arrestua në një lokal pranë zonës bregdetare të Shkëmbi i Kavajës.
Policia dhe grupi hetimor po punojnë për zbardhjen e rrethanave dhe për të dokumentuar motivet.
Vrasja në kryeqytet, picieri got me thikë kuzhinjerin e lokalit
Në zonën e Komuna e Parisit, në ambientet e lokalit City Lounge, rreth orës 15:30 pasditen e së marte, ka ndodhur një konflikt mes dy punonjësve të lokalit.
Autor dyshohet të jetë Filip Shehu (rreth 41 vjeç), i cili ka goditur me thikë kolegun e tij, kuzhinierin Indrit Ismaillari (34 vjeç).
Sipas dëshmive, konflikti kishte nisur prej kohësh, viktima e akuzonte autorin për bullizim dhe fyerje të shpeshta.
Pas plagosjes, viktima u dërgua me urgjencë në spital, por nuk mbijetoi plagët. Autori u arrestua në vendngjarje nga forcat e rendit.
Kjo ngjarje rikthen në vëmendje tensionet që ndodhin edhe në ambientet e punës e privatë, që përfundon në tragjedi për motive të dobëta.
Vrasja në Berat, sherr për një kalë
Në lagjen e Kalasë së Beratit, rreth orës 15:10 të së martës, u shënua një vrasje me thikë ku viktimë u bë 42-vjeçari Skënder Hoxha, nga 63-vjeçari Kristo Mema, banues në Berat.
Shkak i konfliktit dyshohet të jetë bërë një kalë që autori e shfrytëzonte për t’u ofruar xhiro turistëve në zonën turistike të Kalasë së Beratit. Për këtë, viktima ishte në zonë si vizitor dhe u përfshi në përplasje fizike që përfundoi tragjikisht.
Autoritetet zbuluan se 63-vjeçari Mema ka precedentë penalë në Greqi për vrasje me thikë. Ai ndodhet në arrati, ndërsa policia është vënë në ndjekje për kapjen e tij.
Alpenews.al
