Falë një informatori, policia italiane ka arritur që të kapë një të ri shqiptar i cili po qëndronte në një objekt turistik në Solferino.
Plot 95 kilogramë drogë e llojit marijuanë u gjet e paketuar në çanta të zeza të mëdha, që ngjanin me thasët e babagjyshave për Krishtlindje dhe Vitin e Ri.
Operacioni u krye pasditen e djeshme dhe karabinierët arritën që të zbulonin ku fshiheshin edhe 650 euro të fituara si rezultat i shitjeve të drogës.
24-vjeçari me origjinë shqiptare , i cili ka inicialet H.E vu në shënjestër pas një pune të gjatë vëzhgimi dhe analize, duke marrë informacion nga burime të ndryshme konfidenciale.
Qëllimi ishte që t’i jepej një goditje e fortë shpërndarjes së drogës para festave, pasi kishin vënë re një shtim të personave të dyshimtë në zonë para periudhës së Krishtlindjeve.
Policia tha se nga burime të sigurta gjeti se në këtë zonë kishte qytetarë shqiptarë që tregtonin marihuanë.
Gjatë kontrollit është zbuluar se shqiptari kishte qenë në zonë prej disa muajsh. Pasi u identifikua edhe dhoma e tij, 24 vjeçarit iu gjet tre çanta të mëdha të zeza, që kishin brenda disa pako me drogë me peshë rreth 1 kg secila, dhe dy qese plehrash që kishin brenda marijuanë të paketuar, si dhe një peshore elektronike.
Gjithashtu brenda makinës së të riut, një “Chevrolet Matiz” me ngjyrë të kuqe, policët kanë gjetur një pajisje për paketimin pa ajër të dozave, ndërsa H.E. kishte edhe një shumë prej 650 eurosh në kartëmonedha të prerjeve të ndryshme. Vlera totale e gjithë drogës sipas policisë italiane shkon në rreth 600 mijë euro.
