Një foshnjë ka vdekur pasi është goditur nga një breshër i madh gjatë një stuhie të frikshme në Spanjë.
“Daily Mail” shkruan se 1-vjeçarja ishte një nga 30 personat e lënduar pasi u godit nga breshëri deri në 4 centimetër të gjerë, rreth qytetit katalanas La Bisbal de l’Emporda.
E mitura është dërguar në spitalin Josep Tueta në Girona të martën pasdite, por ndërroi jetë disa orë më vonë. Nuk dihet ende kombësia e vogëlushes që vdiq dhe se ku ndodhej saktësisht kur u godit nga breshëri që e vrau.
Ndërkohë thuhet se një grua ka qëndruar ditën e sotme në të njëjtin spital për shkak të plagëve të marra nga stuhia shkatërruese e breshërit.
Shumica e 28 personave të tjerë që kishin nevojë për trajtim mjekësor thuhet se kanë pësuar lëndime në kokë, ose prerje nga akulli dhe si pasojë kishin nevojë për qepje. Gjithashtu kishin edhe kocka të thyera.
