Një tragjedi ka tronditur Rio de Janeiro, pas vdekjes së Barbara Elisa Yabeta Borges, 28-vjeç, e cila u godit nga një plumb ‘qorr’ gjatë një përleshjeje mes bandave.
Ngjarja ndodhi vetëm disa ditë pas një operacioni masiv të autoriteteve në favela, ku u vranë të paktën 100 persona.
Barbara, punonjëse banke dhe blogere udhëtimesh, po udhëtonte në sediljen e pasme të një taksie pranë urës Fundao, kur anëtarët e bandës hapën zjarr. Sipas shoferit, të shtënat u dëgjuan papritmas, dhe Barbara u godit në kokë. Ajo u transportua urgjentisht në Spitalin Geral de Bonsucesso, por për fat të keq nuk mundi të shpëtonte. Policia konfiskoi një pushkë, karikatorë dhe municione nga vendngjarja.
Shoferi përshkroi momentet dramatike:
“Dëgjova një krismë, shkova përpara dhe i thashë të zbriste. Shpejt pashë se ishte qëlluar. Ajo po përpiqej të merrte frymë. Në atë moment, doja vetëm t’i shpëtoja jetën. Ishte sikur një bombë kishte rënë në makinën time.”
Ngjarja ndodhi gjatë një shkëmbimi zjarri midis bandave rivale kriminale. Një mesazh ngushëllimi për burrin e Barbarës thoshte:
“Nuk mund ta imagjinoj dhimbjen që ndjen tani, por nga thellësia e zemrës sime i kërkoj Zotit të të udhëheqë zemrën përballë kësaj humbjeje. Qëndro e fortë.”
Shoqja e Barbarës, Fernanda Vicencio, shtoi: “Të telefonova me dëshpërim dhe doja të dëgjoja zërin tënd. Doja që të ishte një makth dhe të zgjohesha. Do të të dua përgjithmonë.”
Disa orë para vdekjes, Barbara kishte publikuar një postim prekës dhe profetik në Instagram, duke nxitur ndjekësit të “kujdeseshin për ata që i duan” dhe duke paralajmëruar se “njerëzit janë të pazëvendësueshëm”.
Barbara, e cila së fundmi ishte promovuar në bankën ku punonte në Zonën Jugore të Rio de Janeiro, shpesh ndante foto nga aktivitetet e saj sportive dhe udhëtimet, duke frymëzuar mbi 18,000 ndjekësit në Instagram.
Ngjarja po hetohet nga autoritetet braziliane.
