Policia Kufitare në aeroportin ‘Nënë Tereza’ në Rinas pasi tentuan që të fusnin në Shqipëri kanabis, të ndarë në katër valixhe.
Në këto valixhe që vinin nga Tajlanda, autoritetet e Policisë së Kufirit në Rinas gjetën në total 120 pako me kanabis sativa me THC të lartë, e cila pasi u peshua rezultoi të ishte 61 kg.
Valixhet, të cilat ishin mbështjellë me qese plastike, kishin brenda paketim të frutit ekzotik të duranit të thatë, por pasi hetuesit i hapën, gjetën brenda paketimit lëndën narkotike që për nga cilësia është shumë më e shtrenjtë se kanabisi normal që kultivohet në Shqipëri.
Valixhet ishin në pronësi të dy kinezëve, të cilët fillimisht udhëtuan nga Bangkoku me tranzit në Emiratet e Bashkuara Arabe dhe destinacion fundor Tiranën.
Autoritetet shqiptare u vunë në dijeni se brenda valixheve të tyre kishte drogë që para se avioni i tyre të zbriste. Pas kontrollit, kinezët Ye Guozheng, 37 vjeç, Chen Jian, 48 vjeç, u arrestuan në flagrancë.
Të dy kinezët, të marrë në pyetje nga hetuesit, nuk dhanë detaje pa praninë e avokatëve, ndërsa pritet që në vijim t’u nënshtrohen seancave të tjera të pyetjeve, për të zbuluar bashkëpunëtorët e tyre në Shqipëri.
Ky është rasti i dytë brenda pak muajve që nga Tajlanda vjen sasi droge me tranzit prej Emirateve Arabe. Droga me THC hynë në tregun vendas edhe përmes dërgesave me postë, ndërsa Tajlanda në Azi dhe SHBA janë 2 vendet kryesore të tentativave për sjelljen e saj. Sipas burimeve pranë Antidrogës, ky lloj kanabisi në Tiranë shitet 3 gramë për 100 euro.
“Bazuar në informacionet e siguruara nga Njësia e Informacionit për Pasagjerin, Policia Kufitare Rinas, në bashkëpunim me Seksionin e Narkotikëve në DVP Tiranë dhe me Drejtorinë e Hetimit Doganor, organizuan dhe finalizuan operacionin policor “Quality”. Si rezultat i operacionit u arrestuan në flagrancë shtetasit kinezë: -Y. G., 37 vjeç dhe Ch. J., 48 vjeç.
Këta shtetas u kapën në flagrancë në hyrje në Rinas me 2 valixhe me rreth 61 kilogramë lëndë të dyshuar narkotike Cannabis Sativa me përqindje të lartë THC, që dyshohet se e kanë trafikuar nga Bangkoku, me qëllim shitjen në Shqipëri. Sasi e kanabisit u sekuestrua me cilësinë e provës materiale”, njoftoi Policia.
Po ashtu, vijojnë hetimet e thelluara për të zbuluar persona të tjerë që mund të jenë implikuar në këtë rast. Kujtojmë se më parë policia shqiptare ka goditur disa raste të ndryshme të trafikimit të kanabisit me përqindje të lartë THC-je që kryhej përmes postës. Rasti më i fundit është ai i 27 shtatorit në Vorë ku një 22-vjeçar nga Shkodra u kap duke marrë drogën që vinte me pako nga Kanadaja.
